【阿肥給大家的說話】
各位，我等陣入院喇！
不過手術就聽日先做！
噚日喺堡壘執咗成晚包袱，好似小學去旅行一樣！
我仲特登買咗個公仔袋嚟裝行李，氹吓自己嘛！(其實係咁啱見到！換購價$129！我童心未泯嘛！)
其實手術唔算太複雜，但因傷口會持續流血，醫生建議我休息一星期！
所以如果冇乜大礙，我應該4-10-2021(一)可以復工！
到時一班老友記又要俾我煩喇！
呢幾日我不停喺度諗，如果我真係唔再返嚟，有乜說話想同大家講呢？
宜家就喺度講一講啦！
如果我唔再醒返，我最唔捨得嘅係我細妹！佢始終係我唯一一個親人，我成副身家財產寫哂俾佢㗎喇！阿慧，多謝妳！成日磅住我！
其次就係小咪、二筒、甜筒！不過小咪仲有家姐細妹睇住，二筒甜筒依舊喺狗場生活，佢哋冇咗我都唔會好覺！應該好快可以忘記我！
之後係一班曾經關心同幫助過我同肥媽嘅朋友，抱歉我未能夠向你哋一一致謝；不論我哋是否相識，你哋對我哋嘅恩情我會永遠記住！
我本身冇乜朋友，對我好嘅大多喺細妹身邊嘅人；抱歉因為我係Jenny家姐，結果拉埋大家落水；要大家不時為我操心，真係好對唔住！
講到工作喇！我最唔捨得嘅一班支持我嘅老人家！我唔知佢哋有冇氹我？佢哋話成日聽到有人讚我，話我對人好喎！如果唔係幻聽，我信哂㗎喇！
同事方面，我比較唔放心我嘅好拍檔同teammates；雖然我唔算係一個好隊長，但我係絕對真心對大家好！
不過，都係嗰句，呢個世界冇話邊個冇咗邊個唔得，職場尤其！我唔再返嚟，老細好快會請到人頂我；到時新同事可能更優秀同受歡迎！「阿肥姑娘係邊個？唔記得咗喇！」
最後，多謝喺夜空陪伴我嘅每一位！你哋嘅出現，令我覺得自己尚有一啲價值！我希望大家永遠記得我同肥媽！
噚晚我同肥媽講：「如果我唔再醒返，我希望佢同大咪第一時間嚟接我！」
感覺就好似玩拔河一樣！我好想盡快返去肥媽身邊，但又覺得就咁走咗，細妹會俾我攪到好麻煩、好可憐！(到時拜託Joey妹幫吓佢喇！)
唔理咁多喇！一切交俾天父！最驚係死鬼咗，但落咗地獄，到時永遠見唔到肥媽啫！
各位～有緣再見！
Search